EUSF_GesuQam

Tidlek l-Intiena bil-Fwieħa

Ħadd il-Għid (Ġw 20, 1-9 / Lq 24, 13-35)

Min se jgerbibilna l-ġebla? Hekk smajna fil-Vanġelu li ġie mxandar lilna fil-Velja tal-Għid. Min jaf kemm-il darba staqsejna din il-mistoqsija! Nimmaġinaw din il-preokkupazzjoni ta’ dawn in-nisa. Il-Vanġelu jgħidilna b’mod li ma jħalli l-ebda dubju dwar din id-diffikultà: “Kienet ġebla kbira ħafna” (Mk 16, 4).

Jista’ jkun li f’ħajjitna hemm ġebla tqila ħafna u bl-ebda mod ma nafu kif ser inwarrbuha?  

Min se jgerbibilna l-ġebla? Meta ser tinfetaħ triq quddiemna u nimxu b’rasna mgħollija b’tama ċerta li ser jirnexxilna ngħixu ħielsa u ferħana? 

Min ser igerbibilna l-ġebla tal-mard, tal-infedeltà, tal-problemi finanzjarji, tad-dwejjaq u l-għeja? Min ser igerbibilna l-ġebla tar-rabja, tal-vizzju li ħakimna? Min ser igerbibilna l-ġebla tan-nuqqas ta’ mħabba? Min ser igerbeb il-ġebla li għandna bħala poplu, il-ġebla tal-preġudizzji, tal-partiti, tal-gost li donnu għandna f’demmna li nieħdu gost ninfirdu fuq kull ħaġa ta’ xejn, f’argumenti mimlija piki, imma mingħajr l-ebda ħjiel ta’ intelliġenza? 

Kemm ġebel f’ħajjitna! Min ser igerbibhom? 

Sabu l-ġebla mgerba u nħasdu. Iva, għax wara li jgħaddi s-Sibt, ix-xemx titla’. 

Il-ġebla titgerbeb jekk f’qalbek Alla xegħel ix-xewqa li tfewwaħ il-mewt. Dawn in-nisa kellhom xewqa waħda, li jidilku l-ġisem ta’ Ġesù bil-fwieħa. Dak il-ġest, li għal Marija oħt Lazzru, kien ġest familjari. Imma issa ġisem il-Mulej huwa mejjet, u f’moħħhom kellhom ċerta urġenza li jagħtu qima lill-ġisem mejjet ta’ Ġesù qabel ma jkun tard wisq. Ġa kienu tilfu ġurnata ħabba l-preskrizzjonijiet tal-liġi Lhudija li kienet tipprojbixxi li tidlek ġisem mejjet f’Jum is-Sibt u biex tgħaxxaq inzerta l-Għid tal-Lhud. 

Żgur li dan ma kienx ser ikun mument faċli. Li tidlek ġisem mejjet, mhux faċli aħseb u ara tidlek ġisem fraġellat. F’qalbhom kellhom ix-xewqa li jidilku l-ġisem ta’ Ġesù magħmul ferita waħda. F’qalbhom kellhom il-ferita tal-inġustizzja, tal-firda, ta’ aspettazzjonijiet delużi, imma l-attenzjoni tagħhom ma kinitx fuq il-feriti ta’ qalbhom imma fuq l-imħabba, li dak il-ġisem, anke jekk mejjet, kellu jittrażmetti f’qalbhom.

Imma Ġesù jaħsadhom! Kull darba li aħna jkollna f’qalbna li nfewħu fejn hemm il-mewt, li nidilku bil-fwieħa fejn hemm il-qerda, li mmorru ngħaġġlu nħobbu anke f’qabar, il-ġebla titgerbeb.

Allura tajjeb insaqsi, fejn il-Mulej qed jistedinni nidlek bil-fwejjaħ? Liema ċirkustanzi f’ħajti li dejjem rajthom bħala mewt, diżappunt, delużjoni, kif jien imsejjaħ nidlikhom bil-fwieħa? Inħalli l-weġgħat tiegħi, jagħlqu kollox ġo qabar? Fejn il-Mulej qed jistedinni nitbissem, fejn dejjem inħares b’ħarsa mqita? Fejn il-Mulej qed jistedinni ngħid kelma ta’ ħlewwa fejn is-soltu dejjem neqred u ngerger? Liema hi dik is-sitwazzjoni, abbli immaġinarja li twerwirni, lest inħares lejha bi ħlewwa u nidlikha bil-fwieħa? Nista’ nħares b’ġenerożità lejn dik is-sitwazzjoni li tant nibża’ li teħodli xi ħaġa? X’għadni ma aċċettajtx f’ħajti? X’qed nibża’ li nitlef? 

Dan hu l-qawmien! Ġesù lest jerġa’ jiltaqa’ miegħek il-Galilija. Hemm fejn beda kollox, fejn ma kienx hemm dell ta’ tradiment, dell ta’ min hu l-ikbar, tan-nuqqas ta’ fidi, fejn kollox kien entużjażmu ta’ “Sibna l-Messija” (Ġw 1, 41). Kien hemm bżonn ukoll li jiġri dan kollu biex dawk ta’ miegħu jaslu jemmnu li l-fedeltà tal-Mulej tibqa’ għal dejjem.

Illum qed niċċelebraw l-Għid tal-Mulej, u fih qed niċċelebraw l-Għid tagħna. Is-salib m’għandux l-aħħar kelma, il-qawmien għandu l-aħħar waħda.

Mill-ktieb “Ejjew u Strieħu Ftit” ta’ Fr Andrew Galea OFM Conv.

SpiccajtE05_WebsiteImage

Spiċċajt E05 : Spiċċajt meħlus

Dan hu l-filmat tat-taħdita tal-kelliem Mr Tonio Caruana għall-eżerċizzi tar-Randan 2024. Din kienet il-ħames u l-aħħar taħdita li kellna għal dan ir-Randan.

EUSF_InAHurry

Għaġla

Id-Daħla Solenni tal-Mulej f’Ġerusalemm (Mk 14, 1-15, 47)

Kien għad baqa’ jumejn għall-Għid u f’jumejn il-qassisin il-kbar u l-Kittieba, f’għaġla għamja, riedu jħejju kumplott kif jeliminaw lil Ġesù. Impressjonanti li qagħdu attenti li ma jneħħuhx fil-festa li ma tmurx tqum xi rewwixta! Ma ridux iħassru festi, imma jeqirdu lil Ġesù riedu u ma kellhomx żmien x’jitilfu. 

Il-mara bil-vażett tal-alabastru wkoll kellha l-għaġla. Il-ħeffa, li mingħajr ma taħsibha, tidħol f’baħar miżgħud klieb il-baħar, u tpoġġi fil-prattika l-ħsibijiet ta’ moħħha u qalbha u xxerred iż-żejt ifuħ ta’ ward safi fuq ras il-Mulej. 

Il-mistednin ta’ Xmun l-imġiddem kellhom l-għaġla li jeħduha magħha, jiġġudikawha ħalja. Kellhom l-għaġla jfittxu skuża l-għala dan l-istagħġib tagħhom, il-għala ħadu skandlu u ġabu skuża bil-foqra. 

L-Imgħallem ukoll kellu l-għaġla li jiddefendiha u li jagħti ġustifikazzjoni għall-aġir ta’ ħniena u mħabba li kienet uriet miegħu. Dak li għamlet il-mara għal Ġesù huwa Vanġelu, infatti jistqarr li kull fejn tixxandar il-Bxara t-Tajba, dan jingħad ukoll b’tifkira tagħha. U hekk seħħ tassew. L-Evanġelisti Mattew, Mark u Ġwanni jpoġġu dan ir-rakkont fil-bidu tar-rakkonti tal-passjoni tagħhom. 

Min jaf il-Mulej fuq is-salib b’xagħru mgħakkar bid-demm ftakarx fil-ġest ta’ din il-mara li dellkitlu rasu bil-fwieħa? L-awtur tar-raba’ Vanġelu jgħidilna li din il-mara dellkitlu riġlejh. Min jaf ftakarx fuq is-salib, b’riġlejh imwaħħlin mal-għuda, fil-ġest tal-mara minn Betanja? Min jaf il-ġest tal-ħasil ta’ riġlejn id-dixxipli tiegħu kellux dan il-ġest f’moħħu?

F’din is-silta niltaqgħu ma’ nies mgħaġġlin; min iħobb u min biex jobgħod. Żgur li l-Mulej kellu l-għaġla li jwettaq ir-rieda tal-Missier. F’Kapitlu 12 tal-Vanġelu skont San Luqa nsibu l-kliem qawwi ta’ Ġesù dwar l-għaġla li kellu li fih iseħħ ir-rieda tal-Missier: “Nar ġejt inqabbad fuq l-art u kemm nixtieq li qabad” (Lq 12, 49). 

U int u jien x’inhi l-għaġla li tikkaratterizzana? 

Hija l-għaġla tal-ġudizzju li nfajru bl-addoċċ fuq kull min jagħmel xi ħaġa li taħsadna, li tħawwadna, li ddaħħalna f’dubju, li tisfida ċ-ċertezzi tagħna? Għandna l-għaġla li nsibu skuża għall-ġudizzji mgħaġġlin tagħna? Fl-aħħar mill-aħħar xi nkunu qed niddefendu meta ngħaġġlu biex insibu l-ġustifikazzjonijiet għall-ġudizzji tagħna? Ma ninsewx li l-biża’ tagħmilna dejjem iktar riġidi. 

Għandna l-għaġla biex nippruvaw nifhmu? U biex nifhmu l-għaġla li jrid ikollna hi biex nisktu u nosservaw. Nitgħallmu nwaqqfu moħħna mill-bżonn li jtajjar minn quddiemu dak kollu li b’xi mod jista’ jħawdu. L-għaġla biex tifhem u tagħder trid tieħu l-forma li tieqaf, il-prontezza li ma toħroġx mill-ewwel iċ-ċertezzi tiegħek u tiddefendihom. Jekk tagħmel hekk ma tkunx qed tiddefendi l-verità ħlief ’il dik li weħilt magħha, li mingħajrha abbli tħossok vulnerabbli. 

Jagħtina l-Mulej li f’dawn il-jiem qaddisa nifhmu kemm Alla tagħna fuq is-salib ikisser l-iskemi mentali tagħna. Hu s-Samaritan it-tajjeb li ma kienx marbut mal-liġi bħall-qassis u l-levita, u bħal din il-mara jħalli li l-unika liġi li tmexxih tkun l-imħabba. Nieqfu quddiem il-passjoni tal-Mulej u ngħaġġlu li nħobbuh biex nhar il-Ġimgħa l-bewsa li nagħtu lill-Kurċifiss tkun radd ta’ ħajr għal-libertà li nissilna fiha bil-mewt u l-qawmien tiegħu.

Mill-ktieb “Ejjew u Strieħu Ftit” ta’ Fr Andrew Galea OFM Conv.

SpiccajtE04_WebsiteImage

Spiċċajt E04 : Spiċċajt nistenna lil Alla

Qed inwasslu l-filmat tar-raba’ taħdita għall-eżerċizzi tar-Randan 2024. Il-kelliem hu Fr Mark Sultana.

Dawn it-taħdidiet qed isiru kull nhar ta’ Ġimgħa fis-7:00pm fil-Knisja tal-Qawra matul ir-Randan 2024, b’kull taħdita titratta tema differenti.

EUSF_GirlInPain

Ħniena li tiskandalizzana

Il-5 Ħadd tar-Randan (Ġw 12, 20-33)

Ġieli ġratilkom li tmorru taraw lil xi ħadd marid u jġibilkom ħniena bl-istat li fih ikun jinsab. Naħseb li lkoll kellna din l-esperjenza li naraw lil xi ħadd li nkunu nħobbu qed ibati u qalbna tingħafas bil-ħniena. Madanakollu forsi ftit nindunaw li f’dak il-ħin tkun qed tintwera ħniena magħna. Kif? F’dak il-mument li jien tiġini ħniena minn xi ħadd li jkun qed ibati, tkun qed tintwera ħniena miegħi. Min ikun marid ikun qed jifdini mill-egoiżmu tiegħi, ikun qed jifdini mill-bżonn li nħares biss lejn il-bżonnijiet tiegħi, ikun qed joħroġni minni nnifsi biex jgħinni nuri ħniena. Inkun qed ninfeda mid-dnub tiegħi li naħseb biss fija nnifsi.

San Franġisk t’Assisi jista’ jgħinna nifhmu dan b’mod sempliċi. Nafu li l-konverżjoni ta’ San Franġisk, iġifieri l-mument li ħareġ ’il barra u waqaf jadura lilu nnifsu hija l-laqgħa tiegħu mal-lebbruż. Franġisk issa ma jiltaqax iktar mal-fqir li ma jista’ jagħtih xejn imma jiltaqa’ ma’ lebbruż li jista’ jagħtih biss il-marda tiegħu. U lilu jbus! Fehem li jista’ jirċievi ħafna meta l-ieħor ma jista’ jagħtih xejn anzi jista’ jagħmillu l-ħsara. Huwa f’dan il-mument li Franġisk neża’ minn kollox! Dak il-lebbruż seta’ jagħtih xi marda, imma araw x’tah. “Dak li qabel għalija kien morr inbidel għalija fi ħlewwa tar-ruħ u l-ġisem” (Kitbiet, Testment ta’ San Franġisk, v. 3). Hekk jikteb fit-Testment tiegħu. Proprju San Franġisk għamel ħniena mal-lebbruż, imma fil-verità huwa l-lebbruż li għamel ħniena ma’ San Franġisk.

U proprju għalhekk li issa jista’ jikkontempla l-Kurċifiss li għalkemm id-dehra tiegħu ġġiblek ħniena ġaladarba “ma kien fih ebda sura biex inħarsu lejh jew ġmiel biex nitgħaxxqu bih” (Is 53, 2), imma huwa Hu li f’dik il-kruha qed jagħmel ħniena miegħu. Għax Franġisk issa ma jħarisx lejn il-kruha tas-salib, tad-dnub, imma lejn l-imħabba li wasslitu jsir kruha mdendla ma’ għuda minħabba li “Dak li ma kienx dnub, Alla għamlu dnub għalina” (2 Kor 5, 20).

Huwa b’dan il-mod li Ġesù jiġbed lill-bnedmin kollha lejh meta jintrefa’ ’l fuq! Huwa l-Kurċifiss bil-kruha tiegħu, li waqt li jġiblek ħniena jagħmel ħniena miegħek. Huwa dan il-Kurċifiss li jfejjaq. Meta ninduna li Alla ma jarax id-dnub fija imma l-fedeltà ta’ ibnu msallab għalija. Meta ninduna li Ġesù ma ssallabx biex ibiddel l-idea ta’ Alla dwari, imma biex bil-fedeltà tiegħu jien nibdel l-idea żbaljata li kelli ta’ Alla, jien infiq.

Huwa dan biss li jfejjaqni – ħarsa ta’ ħniena. Ħarsa ta’ ħniena fuqi nnifsi, ħarsa ta’ ħniena lejn id-dnub tiegħi, ħarsa ta’ ħniena lejn id-dnub tal-oħrajn. U dan kollu huwa don! Kollox b’xejn! Il-ġest ta’ Ġesù fuq is-salib isir fi gratwità totali. Dik hi l-ħniena. Papa Franġisku fil-ktieb L-isem ta’ Alla huwa ħniena  jirrakkonta l-istorja ta’ waħda mara li marret titlob ħniena lil wieħed sultan għal binha. Is-sultan iweġibha: “Imma ma jistħoqqlux.” Il-mara twieġbu: “Proprju għalhekk qed nitolbok il-ħniena għax ma jistħoqqlux.” L-istess Papa jgħidilna li l-ħniena tmur tarġa ’l fuq mill-ġustizzja umana. Il-ħniena ta’ Alla tiskandalizzana, kif tiskandalizzana l-Ħniena ta’ Ġesù fil-Vanġelu. Hija don tiegħu kif jgħid l-istess San Franġisk: “Meta kont għadni fi dnub, il-Mulej tani l-grazzja li nibda nagħmel penitenza b’dan il-mod…” (Kitbiet, Testment ta’ San Franġisk, v. 2).

Jekk din il-ħniena għadha tiskandalizzana, allura jista’ jagħti l-każ li aħna għadna nqisu ruħna wisq bħala bnedmin ġusti! Jekk nindunaw li aħna midinbin imma maħbuba nistgħu nlissnu mal-Griegi tal-Vanġelu: “Nixtiequ naraw lil Ġesù” (Ġw 12, 21). U mbagħad l-imħabba tfejjaqna u d-dawl jieħu post id-dlam, u nikkonvertu.

Mill-ktieb “Ejjew u Strieħu Ftit” ta’ Fr Andrew Galea OFM Conv.

EUSF_RabbiReading

Moħħu Forma ta’ Liġi

Ir-4 Ħadd tar-Randan (Ġw 3, 14-21)

Fariżew kien Nikodemu. Moħħu forma ta’ liġi! Madanakollu jmur għand l-Imgħallem. U dan Ġesù għandu ħabta li lil min jirraġuna wisq b’qalbu jgħinu juża naqra iktar moħħu u lil min jaħseb iktar b’moħħu jgħinu jagħraf iktar b’qalbu. Nikodemu ma jistax jifhem xi tfisser titwieled mill-ġdid. Forsi fil-kodiċi tal-liġi Lhudija dan it-terminu ma kienx jintuża. U allura Ġesù jkellem lill-qalb: “Għax Alla hekk ħabb lid-dinja li ta lil Ibnu l-waħdieni biex kull min jemmen fiH ma jintilifx, iżda jkollu l-ħajja ta’ dejjem” (Ġw 3, 16).

Min jemmen fl-imħabba jsalva. Ġesù jgħid li meta ser jintrefa’ ’l fuq ser jiġbed lill- bnedmin kollha lejh. Ġesù qed jistedinna biex inħarsu lejn il-Kurċifiss u nemmnu. Hija din l-imħabba li ssalva, li tfejjaq. Quddiem il-Kurċifiss jien jista’ jkolli reazzjonijiet differenti. Nista’ nirrabja għal Alla li tilef, li ħalla lil kulħadd jagħmel li jrid bih, li ħalliehom jobżqulu, jgħajruh jew isallbuh. Nista’ nirrabja għal Alla li ħalla lil Ibnu jissammar ma’ salib mingħajr ma għamel xejn. Nista’ nkompli nirrabja għax Alla donnu anke llum ma jagħmel xejn quddiem il-ħażen fid-dinja. Din hija l-kundanna, li fis-salib nara biss storja li spiċċat ħażin, Alla li jastjeni li jagħmel xi ħaġa, li ma jiħux pożizzjoni. Nirraġuna: “La ma jagħmel xejn hu nagħmel xi ħaġa jien.” Jiġrili iżda li ninsa li rabja ġġib rabja, sejf iġib sejf u vjolenza ġġib vjolenza.

Min-naħa l-oħra nista’ nħares lejn il-Kurċifiss u nemmen fl-imħabba u dik l-imħabba ssalvani.

Il-Kurċifiss jgħallimni l-Fedeltà. L-Iben ta’ Alla jibqa’ fidil sal-mewt għall-messaġġ ta’ mħabba li kellu jwassal.

Il-Kurċifiss jgħallimni nkun Iben. Alla bagħat lil Ibnu għax l-Iben biss seta’ jgħidilna: “Kif ħabbni l-Missier, hekk ħabbejtkom jien, ibqgħu fl-imħabba tiegħi” (Ġw 15, 9). Fedeltà u mħabba sal-mewt!

Il-Kurċifiss jgħallimni li mal-Verità ma nilgħabx. Hu stess jgħid fl-aħħar versi tal-Vanġelu li smajna jgħid li min hu fil-verità m’għandux għal xiex jibża’. Jibża’ min hu giddieb għax jaf li llum, għada jew pitgħada s-sewwa jirbaħ. “Għax kull min jagħmel il-ħażen jobgħod id-dawl, u ma jersaqx lejn id-dawl, biex għemilu ma jinkixifx. Imma min jagħmel is-sewwa jersaq lejn id-dawl, biex juri li hemm Alla f’għemilu” (Ġw 3, 20).

Il-Kurċifiss jgħallimni li biex nagħti l-ħajja lil xi ħadd irrid immut għalih. Kull mewt, li hija frott ta’ għotja, dejjem ser tħalli l-ħajja f’xi ħadd.

Dawn huma xi ftit mill-grazzji li jiġru fina meta nħarsu bil-fidi lejn il-Kurċifiss. Hu ntrefa’ ’l fuq, jonqos issa li aħna nħarsu lejh bil-fidi u nħalluh ifejjaqna.

Mill-ktieb “Ejjew u Strieħu Ftit” ta’ Fr Andrew Galea OFM Conv.

SpiccajtE03_WebsiteImage

Spiċċajt E03 : Spiċċajt f’Ansjetà

Wasalna fit-tielet taħdita għall-eżerċizzi tar-Randan 2024, bil-kelliem Fr Peter Paul Sultana jittrata it-tema tal-ansjetà fil-ħajja tan-nisrani.

Dawn it-taħdidiet qed isiru kull nhar ta’ Ġimgħa fis-7:00pm fil-Knisja tal-Qawra matul ir-Randan 2024, b’kull taħdita titratta tema differenti.

SpiccajtE02_WebsiteImage

Spiċċajt E02 : Spiċċajt f’Deżert

Inkomplu bis-sensiela ta’ taħdidiet għall-eżerċizzi tar-Randan 2024. Il-kelliem did-darba kien Fr Ivan Scicluna.

Dawn it-taħdidiet qed isiru kull nhar ta’ Ġimgħa fis-7:00pm fil-Knisja tal-Qawra matul ir-Randan 2024, b’kull taħdita titratta tema differenti.

EUSF_Salesgirl

Meta Qalbi Ssir Suq

It-3 Ħadd tar-Randan (Ġw 2, 13-25)

Jien naqra stramb meta mmur nixtri. Normalment inkun irrid noqgħod waħdi, nara l-affarijiet bil-kwiet, niċċekkja, naħseb, nipprova, nagħżel. Jekk jiġi xi ħadd fuqi mimli entużjażmu biex ibigħ u jgħidli: “Ara ħu din”, “Naħseb din tixraqlek”, “Ara hawn din ukoll”, “Jekk ma tixtieqx tonfoq ħafna hawn dawn ukoll”, inħossni nippanikja u f’qalbi ngħid: “Jaħasra kieku taf kemm mhux qed tgħinni” u nispiċċa nwieġeb: “Ġejt biex nara biss ta”, u bil-mod il-mod inlebbet ’il barra u, kif noħroġ, ngħid: “Fl-aħħar ftit arja!” Jiġrili hekk ukoll meta nkun irrid nagħmel biċċa xogħol. Jekk inkun irrid nagħmel xi ħaġa li titlob konċentrazzjoni, nibda nitlob li ma niltaqa’ ma’ ħadd, li xejn ma jtellifni l-konċentrazzjoni li jkolli bżonn. 

Ħajjitna faċli tispiċċa fl-istess sitwazzjoni. Ġieli jiġrilna li ħajjitna timtela bl-ilħna ta’ ħafna persuni li jridu jbigħu xi ħaġa lil qalbna. Tispiċċa ma tikkonċentrax għax ħafna jkunu dawk li kważi jisfurzawk tixtri xi ħaġa; ħafna jkunu dawk li anke jekk ma jkollok bżonn xejn jippruvaw b’kemm għandhom saħħa joħolqu fik il-bżonn ta’ xi ħaġa. Kultant dawn jinfurzaw ruħhom fuqna, drabi oħra nkunu aħna li nbexxqulhom il-bieb ta’ qalbna għax b’xi mod niġu sedotti biex nimlew qalbna b’xi ħaġa li donnha ser tagħtina l-ferħ. Normalment nispiċċaw f’baħar ta’ konfużjoni. Tafu x’iġifieri konfużjoni: ‘fużjoni’ tfisser għaqda, ‘con’ tfisser ma’. Il-konfużjoni sseħħ meta jien insir parti minn ħaġa li nitlef il-veru jien. Tant insir parti minn xi ħaġa li nitlef l-identità tiegħi u, fl-isforz li nisma’ l-ħafna ilħna, nitlef li nisma’ l-Leħen (ta’ qalbi jew ta’ Alla). 

Din il-konfużjoni kienet qed tirrenja wkoll fit-tempju ta’ Ġerusalemm. Ġesù taqbiżlu; ma setax iniżżilha li spazju sagru jinbidel f’suq. Kien hemm wisq ilħna, biex ikun possibbli li f’dik il-konfużjoni kollha wieħed jirnexxilu jisma’ l-leħen ta’ Alla. Il-konfużjoni fit-tempju seta’ kellha anke raġunijiet validi. L-affarijiet għall-bejgħ ma kinux biex jagħmlu l-ħsara. Kienu affarijiet li apparentament kollha kien hemm bżonnhom. Il-Lhud fit-tempju ta’ Ġerusalemm ma kienu qed jagħmlu xejn ħażin:

Kien hemm bżonn min isarraf il-flus għax fit-tempju ma setgħux jidħlu muniti pagani allura kienu ivvintaw munita li tintuża biss fit-tempju; 

Kien hemm bżonn min ibigħ nagħaġ, ħamiem u barrin biex ikunu jistgħu jintużaw għas-sagrifiċċju u biex jgħixu l-qassisin. 

Imma anke l-affarijiet it-tajba jistgħu joħolqulna konfużjoni għax ninsew il-għala nkunu qed nagħmluhom. Inbigħu u nixtru biex nagħtu qima lil Alla, imma lil Alla nispiċċaw ma nqimuhx, għax iktar mitlufa fil-preparazzjoni tal-mument, imma l-laqgħa vera tispiċċa ma ssirx.

Ġesù jibda d-diskors tiegħu fuq it-tempju ta’ Ġerusalemm imma mbagħad ikompli fuq “it-tempju tal-ġisem tiegħu”. Jgħidilhom biex iħottu t-tempju u fi tlett ijiem jerġa’ jibnih.

Ġesù jgħolli l-livell tad-diskors minn tempju tal-ġebel għat-tempju li kien hu. Il-Knisja tgħallimna li aħna wkoll nipparteċipaw minn dan kollu. Fil-magħmudija aħna wkoll sirna tempji; tempji tal-Ispirtu s-Santu. Jekk Ġesù jagħmel għaġeb, u bir-raġun għax it-tempju ta’ Ġerusalemm ma baqax spazju sagru minħabba l-bejjiegħa li għamluh monti, kemm iktar jinkwieta jekk aħna nagħmlu minn qalbna suq. Nafu kemm fil-monti jkun hemm geġwiġija ta’ ilħna u storbju. 

Faċli tiġrilna din il-ħaġa. Huwa faċli immens li qalbna ssir ambjent tal-kompromessi; fejn inpartu u nbigħu; fejn għal naqra qligħ illi jgħaddi nitilfu dak li jibqa’ għal dejjem. Kemm hu faċli li qalbna ma tibqax taf xi trid għax joħonquha l-ilħna tal-bejjiegħa li jridu jbigħu l-prodotti tagħhom akkost ta’ kollox. Jiġrilna li nkunu tlifna l-konċentrazzjoni. 

Allura tajjeb illum insaqsi: 

X’inhuma dawk l-affarijiet li ġo fija qed joħolqu konfużjoni? 

X’hemm ’il barra minni li qed inħallih jieħu pussess ta’ qalbi u joħloqli konfużjoni? 

X’nista’ nagħmel biex ma nitlifx il-konċentrazzjoni u ma nitlifx il-paċi tal-qalb? 

Fil-magħmudija tagħna aħna ġejna kkonsagrati; iġifieri sirna proprjetà ta’ Alla. Ġesù jiddejjaq ħafna li t-tempju ta’ Ġerusalemm ma baqax post ta’ konsagrazzjoni, ma baqax proprjetà ta’ Alla. Kemm iktar jiddejjaq meta qalbna ma tibqax proprjetà tiegħu! U dan jagħmlu mhux għax għajjur, imma għax jaf tajjeb li meta nbigħu lil qalbna, dejjem hemm prezz għoli xi nħallsu. Meta nbigħu lil qalbna naħsbu li ser nagħmlu l-qligħ, naħsbu li ser ikollna xi ħaġa li fl-aħħar issa ser tissodisfana. Iż-żmien normalment jurina li mhux biss ma nkunux għamilna qligħ imma talli jkollna nħallsu bl-imgħax biex nerġgħu nieħdu qalbna lura.

Irrabja mela Ġesù, u fittex uriena fejn hi qalbna.

Mill-ktieb “Ejjew u Strieħu Ftit” ta’ Fr Andrew Galea OFM Conv.

EUSF_CrossGlowing

Bejn Tabor u Golgota

It-2 Ħadd tar-Randan (Mk 9, 2-10)

Kienet ħaġa faċli għall-Appostli li jieqfu quddiem it-trasfigurazzjoni tal-Mulej. Ix-xena għoġbithom. Ħassewhom komdi. L-Imgħallem tagħhom kien sabiħ, ilbiesu jiddi bħax- xemx. Instema’ l-leħen jgħid: “Dan hu Ibni l-għażiż, isimgħu lilu” (Mk 9, 7). Kollox sabiħ.

Mhux hekk taħt is-salib. Il-leħen ma nstemax. Anzi l-leħen kien ta’ Ġesù: “Alla tiegħi, Alla tiegħi għaliex tlaqtni” (Mk 15, 34). Il-Mulej fuq is-salib ma kienx trasfigurat, imma sfigurat. Kien imkisser, miksi demm. L-uġigħ kien kbir u jinħass tassew.

Madanakollu, il-Knisja f’dawn il-jiem tistedinna niċċassaw lejn is-salib, naduraw l-agunija ta’ Ġesù, inqimu l-pjagi u l-ġrieħi tiegħu. Il-Knisja tistedinna nħallu l-uġigħ tiegħu jitkellem.

It-tentazzjoni tkun li ma nifilħux għal dik ix-xena u naħarbu niġru minn fuq il-Golgota u nsibu xi mkien għall-kenn. Dun Ġorġ Preca jimmaġina li waqt li nkunu quddiem Ġesù msallab nistħajluh jgħidilna: “Ħares lejja u kkwieta” (Kitbiet, Dawl mill-Kurċifiss).


Quddiem is-salib ta’ ħajjitna nistgħu nagħmlu l-istess u naħarbu. Quddiem l-uġigħ ta’ qalbna nistgħu nagħmlu l-istess u nippruvaw naljenaw ruħna. Arana nagħmlu xi ħaġa biex intaffu l-uġigħ.

Quddiem is-solitudni, naħarbu.

Quddiem il-weġgħat tal-passat, naħarbu.

Quddiem it-tensjoni tal-preżent, naħarbu.

Quddiem l-inċertezza tal-futur, naħarbu.

L-uġigħ insikktuh.

Imma r-Randan jistedinna nħallu l-uġigħ jitkellem. Ir-Randan jistedinna nagħmlu ħbieb mas-salib. Jistedinna nisimgħu l-uġigħ tagħna u ngħixuh, mingħajr għaġla żejda li naħarbu minn fuq il-kalvarju.

U għaliex għandna nqattgħu l-ħin nisimgħu l-uġigħ tagħna? Għax fih hemm moħbija x-xewqat kollha ta’ ruħna. Fis-solitudni x-xewqa għall-intimità, fil-weġgħat tal-passat ix-xewqa għall-fejqan u l-ġustizzja. Fit-tensjoni tal-preżent ix-xewqa li nagħmlu deċiżjonijiet biex ħajjitna tkun aħjar, iktar serena, ħajja li tħalli l-frott. Quddiem l-inċertezza tal-futur hemm moħbija x-xewqa tat-telqa f’idejn Alla u l-konvinzjoni li aħna ma’ Alla nistgħu niktbu ħajjitna.

Mela nisimgħuh l-uġigħ, nagħtuh il-ħin jesprimi ruħu, immellsuh. Anke hu għandu xi ħaġa xi jgħid.

Miegħu nisimgħu l-Kelma ta’ Alla. “La tibżax, jien inkun tarka għalik” (Ġen 15, 1).

Mill-ktieb “Ejjew u Strieħu Ftit” ta’ Fr Andrew Galea OFM Conv.